Saturday, November 26, 2016





හිස් වෙතැයි 
ඔබ බිය වුව ද
පිරී ඉතිරී 
බොහෝ කල් ය
මේ බඳුන



24-11-2016

Thursday, November 24, 2016

නමක් නැති ඍතුව



නමක් නැති මේ ඍතුව
නිමක් නැති හඬ ස්වර උපද්දන 
තෙතක් නැති නියං දෙතොලින් 
සිප ගනිමි

ඉරි තැළුණු ගිම්හාන හදවත
සරත් වැස්සෙහි පොඟවා
අකාලික තරු එළියකට 
අත හරිමි

මලක් නැති මල් සුවඳ
මදහසේ කටු ගවසා
සඳ මුදු දිය ද තවරා 
විඳ ගනිමි

ඉමක් නො දිසෙන මංපෙත
පෙමක් අතැඹුල් කොට
නිමක් නොමවිමසා ම
පිය මනිමි..


23-11-2016

Monday, November 14, 2016

කටහඬ



අඩ ස්වර සෙමෙන් පිරිමැද 
තබා ගෙනැවිත් හිත ළඟ
මද මුදු බවින් ඉකිලන
වේදනා කඳුළක් ද කටහඬ

ශෘංගාර තනුවක කිමිද
රැව් රැළි නගා ඉපිළෙන
සංසාර වෙරළත වැදී වැදී  විසිරෙන
සිලෝවක ස්වරයක් ද කටහඬ 

සොයා සිඳු පහළට ඇදි ඇදි
ගලා යන යන සැඩ ගං දියරැළි
වෙලා දෑතින් උල්පතක් වෙත
යළි ඇදෙන අරුමැසි සිතුවිලි

සරතයේ සිහිල වී හීන මත ඉහෙන
පොද වැස්ස, මධු සඳ ඔඩම මත 
බුබුළක්ව නැගෙන
ඉගැඹුරුම නිහැඬියාවක මුණිවතින් වැයෙන
හඬ නො දෙන තාලයක කිඳී නෙත් පියෙන

මල් නගන මුලක රැඳි වේදනා රැගෙන
විල් දියක පතුළතට කඳුළු කොට ඉහින
නිල් සරැළි හා වෙලී ආදරේ මවන
දුල් සඳක කිරණක් ද කටහඬක් යනු ම?

ඇස් වසා ස්වප්නයක් මුදවන්න
හිස්තැනක් ස්වර ගෙනත් පුරවන්න
විස්මයෙන් නෙත් කඳුළු ඇහැරන්න
උස් ගිරක ඔබ වැතිර
උස් හඬින් නිම්නාද පතුරන්න

13.10.2016

Monday, November 7, 2016

විස්මය



'මට පුදුම ඔබ කිසිවකින් පුදුම නොවන එක....' ඇය කීවා ය. 



විශ්වය ම දවා හළුකොට 
භෂ්ම කළ සිහින පොදියක
රශ්මියක් නො පැතිය යුතු බව
වටහා ගැනුම නොවෙද විස්මය?

රළු අඳුර මැද සැලි සැලි 
විඳ විඳ රැයක සීතල යළි යළි
පිනි මවන තණපත් 
ඒ තමා පුදුම සිතුවිලි

වලාකුළු යට තැවි තැවි
ගලා යනු බැරි රළ රැළි
දරා ගනු බැරි තැන
කවියක්ව උපදින
සියුම් ඉසියුම් දිය රැළි

සත් වසක් වැලි ඇවිලෙන
කතරක් සිඹින මහ වැසි
සිලෝ ගී ගයමින් පිපෙන
මෙලෝ මල් යායක 
දම්පාට නළ රැළි
පොළෝ ගැබ මත ඉපදෙන 
විස්මයක හසරැළි

මිහිදුම් තිර ඇදෙන
සිහිලැල් සරද සවසක
කවුළුව මත වැටෙන
වැහි රටාවක මුහුවෙන
කෝපි සුවඳක මත්වෙන 
ඒ තමා ඍතුවක විස්මය

හිස් අතින් විත් 
ඇස් දෙකෙන් පහන් දල්වා
වස් විසූ හද ලෙන් ගැබ
හිස්තැනක් පුරවන එක 
සන්තානයක අරුමය

ගැස්මක් පවා නො දැනෙන අන්ධකාර ම යාමය
හුස්මත් දිදී රැක්කත් ශේෂ වුණ දේ බිඳුණු හීනය
විස්මයක් ඉදින් වේ නම් තාරකා මැද නිවී ගිය දේම ය
අස්නක් තබා ඇති පිනි මත
කියවා දවාලනු මැන, ඒ මගේ ප්‍රේමය!

02-11-2016