Tuesday, August 25, 2015

මෝහන්



-එක්දහස් නවසිය අසූ තුනේ අප්පගෙ කඩේ මුළුමනින් ම ගිනිබත් වුණායින් පස්සෙ මෝහන්ලගෙ ඉරණම දරුණු විදියට වෙනස් වුණා ලු... (කාලෙකට පස්සෙ අමාරුවෙන් රෙපයාර් කරපු) ගේ පොඩ්ඩ නගර සංවර්ධන සංග්‍රාමෙට අහුවෙලා ඔක්කොම හීනත් එක්ක බුල්ඩෝසරයෙකුගෙ දරුණු දත් ඇඳි වලින් ඇදිලා ගැලවිලා ගියා ලු... 

"මගේ නෝනා හූල්ලලා හූල්ලලා මැරෙයි කියල හිතුණා... රැයවල් ගානක් තැන් තැන් වල ඉඳලා අන්තිමට නාරාහේන්පිට තැනක දැන් ඉන්නවා කුලියට...-"
-සිය කාර්යාලයේ කාර්ය සහායක ගැන සුරේඛා සමරසේන තැබූ සටහනක කොටසකි. 

සමහර කතාවල හමුවෙයි 
මල් සුවඳ
ඒත් 
හිරු එළිය නැත... 
සමහර කතාවල හමුවෙයි
ඉඳි කටු තුඩු 
නිය පහුරු සහ
නො ගැළවුණු ඊතල
ගැළවුනොත් 
ලේ ගලා මියෙන්නට හැක.. 

මොන වගේ විරුවෙක්ද උඹ මෝහන් ! 
දෙපාරක් ආකාසෙ 
ඉහ මත වැටුණත් 
ලාම්පුතෙල් කාලක් වටින 
ජීවිතය අරගෙන 
ඩෝසරයක් යටින් තියා 
සැනසීමෙ නිදියන්න හිතුවද මෝහන් ? 

සදාකාලික වෛරයෙන් දැවී ගිය පොළවක 
දැලි වැකුණු ජීවිතේ නිහඬ සුන් බුන් අතර 
ළය පැලී නෑ සියන් හෙමින් මියැදෙන අතර
අඩු සීනි වැඩි සීනි තේ කෝපි හද හදා 
සීතල ම හිත්වලට උණුහුමක් හදන්නේ 
හද පතුල මැරී නොමැරී පණ ගැහෙන 
හීනයක එක ම එක තාරකා එළියෙන් ද? 

අතීතය කියන්නේ කළුවර ම 
දිග රැයක් විතර ද? 
ඒ රැයට එළිවෙන්න නො හැකිද? 
මතකයක් කියන්නේ 
හීනයක් විතරක් ම නොවන තැන
හීනෙකින් ඇහැරෙන්න ඇහැකිද? 

මල් පොකුර අත නො හැර
කලුවරම මග දිගේ ඇවිදින්න
සුවඳ ක්ෂණයක් පිණිස 
මලෙහි පෙති එකින් එක සිඳලන්න

ඉන් පසුව,
දණ ඔබා නැගෙන විට 
ඔළුව ගෙන බිම අනින ජීවිතය ... 
කුලී සිහිනෙක හොවා 
අපට හැක
මල් පිපෙන තුරු ඉන්න. 


Friday, August 14, 2015

හිතවත් මෛත්‍රිපාල සිරිසේන ජනාධිපතිතුමනි,



ඔය මරා නොහොත් හොරා ට හොඳවැයින් දෙකක් කිව්ව එක නම් ඇත්තට ම හොඳය. ඒ වුනාට ඒක කියවං යද්දි මේ රටේ මිනිස්සු ඔබට ඡන්දය දුන්නේ ශ්‍රී ලංකා නිදහස් පස්සෙ කියල එකක් රැක ගන්න කියල ඔබ හිතනවදෝ කියලත් හිතුනේය. ඔබ ඒකේ ලියා තිබුනේ මරාට නොමිනේෂන් දුන්නේ පක්ෂෙ බේරගන්න බවය! මරා ඡන්දෙට නාව නම් ජනාධිපතිවරණ ජය තහවුරු කරපු ජාතිවාදයට එරෙහි සංවිධාන , තරුණ පිරිස් , විවිධ ජාතීන්ගේ විශ්වාසය ශ්‍රීලනිපයට දිනාගන්න තිබුන බව ය.

(ඇත්තටම ඇයි ඔයා එහෙම හිතන්නෙ? අපි මෝඩයි වගේ පේනවද?)

මරා ඡන්දෙට නාවා නම් අපි හැමෝම නිල් පාට කොඩි අරන් පෝලිමේ ඩලස්ල නිමල් සිරිපාලල ජොන්ස්ටන්ල මහින්දානන්දල පස්සෙන් පක්ෂ කාර්යාලෙට එයි කියා ඔබ හිතුවා නම් ඔබට වැරදිලාය. 

අනෙක් කාරණය අගමැති පත්කිරීම ගැන ඕබේ අදහස ය. ඔබ හිතන විදිහට අගමැතිකම දෙන්න ඕනෙ 'මෙතෙක් අවස්ථාව නොලැබුණ' පක්ෂයේ ජ්‍යෙෂ්ඨ නායකයෙකුට ය. එතකොට අගමැතිකම කියන්නේ ශ්‍රීලනිපයේ අවස්ථාව නොලැබුණ අයට දෙන්න තියෙන මොකක් හරි සම්මානයක් ද? මරා අවුරුදු දහයක් තිස්සේ රට කන කොට, මිනිස්සු අතුරුදහන් කරන කොට, නීතිය බල්ලන්ට කන්න දාන කොට, මානුෂික මෙහෙවරක නාමයෙන් උතුරේ සිවිල් වැසියන් දහස් ගාණක් සමූල ඝාතනය කරන කොට, මූලික අයිතීන් ඉල්ලල මහ පාරට බැහැපු දකුණෙ මිනිස්සුන්ව පාරවල් දිගේ වෙඩි තියල මරන කොට, සංවර්ධනයේ නාමයෙන් රටේ ආර්ථිකය අවුල් ජාලාවක් කරල රාජ්‍ය දේපළ මංකොල්ල කන කොට, රාජපක්ෂ සහෝදරවරු සහ පුත්තු මේ රටේ අඟලක් ගානෙ භීෂණය සහ අණසක පතුරුවන කොට ඔය කියන ජ්‍යෙෂ්ඨයෝ හිටියෙ කොහේද? කළේ මොනවද? ඒගොල්ලොත් ඒකෙන්ම ගොඩ ගිහින් මරාට වැරදුණාම නොපිට ගැහුවා මිසක රටට ආදරයක් ඇති අය නොවන බව අපට වඩා හොඳට ඔබ දන්නා බව දනිමු. 

අපිට මතක විදිහට නම් ජනවාරි අට වැනිදා ඔබ මැතිවරණයට ආවේ ශ්‍රීලනිප අපේක්ෂකයෙක් විදිහටවත් ඔබේ මැතිවරණ ජයග්‍රහණයේ දී තීරණාත්මක ඡන්ද වුනේ කැපුවත් නිල් ඡන්දවත් නොවේය. අනික මේ රටේ මිනිස්සුන්ට ඕනෙ වුනේ මරාගෙන් ගැලවෙන්න මිස හිටපු ශ්‍රීලනිප මහලේකම්ව ජනාධිපති කරගන්නත් නොවේය. අපට ඕනෑ වුනේ අගතියෙන් තොර නිදහස් රටකි. ඉතිං ඔබ තීරණ ගනිද්දි හැමදාටම ඒක මතක තියෙනවා නම් ඔබටයි අපිටයි රටටයි තුනටම හොඳ ය. මොකද රටට වෙන්න ඕනෙ වින්නැහිය වුනාට පස්සෙ ඔබ ඔය කියන මහා පක්ෂේ රැකෙන එකෙන් අපට නම් තඹ දොයිතුවක වැඩක් නැති ය. අපිට ඔයාලගෙ ඔය වැඩවසම් පස්ස තිබුනත් එකය නැතත් එකය. අපිට ඕනෑ දියුණු නිදහස් රටක් මිස මාරුවෙන් මාරුවට රට කන තක්කඩි දේශපාලන පක්ෂ නොව ඇත්ත වුවමනාවෙන් මිනිස්සුන්ට සේවය කරන ජනතාවට වග කියන හරි හමන් මිනිස්සු ය.

පක්ෂෙ සභාපති විදිහට ඔහොම එකක් ලියන්න ඔබට පුලුවන් විය හැක. ඒ වුනාට පක්ෂෙ සභාපති කියන්නෙත් රටේ ජනාධිපති කියන්නෙත් එක්කෙනෙක් ම වෙන කොට මෙහෙම නො කියාත් බැරිය. මෙහෙමවත් ලියන්නේ රජවරු රජ කරපු රටක යන්තම් හෝ සාධනීය ලක්ෂණයක් ඔබ පෙන්වූ නිසාය.

ස්තූතියි.

මීට ,

කල්පනා ඇම්බ්‍රෝස්
ඡන්ද හිමි ශ්‍රී ලාංකික පුරවැසියෙක් 
14-08-2015