Sunday, June 3, 2012

ආදරය, ‘Birth’ හි සිට සසර සැරි සරන තෙක්....



“ආදරය ත්‍රිකෝණාකාරය. ඒ තුළ එකිනෙකට වෙනස් සහ සහසම්බන්ධිතත අංග තුනක් තිබේ. කැපවීම, ජීවිතය විශ්වාසයෙන් බෙදා හදා ගැනීම සහ අනෙකා කෙරෙහි උපන් අනුරාගය යි. මේවායින් කැපකිරීම යනු සබඳතාව සදාකාලික වේය යන බලාපොරොත්තුව තුළින් උපදින්නකි.”
-මනෝවිද්‍යාඥ රොබට් ස්ටර්න්බර්ග් ( Robert Sternberg)


තමුන් පෙම්කරන තැනැත්තිය කෙරෙහි ඇති අසීමිත චෛතසික සහ ශාරීරික බන්ධනය විසින් ලොව ඇති සොඳුරුතම දසුන් අප ඉදිරියේ මවා ගල් කුළු වන් මිනිසුන් පිහාටු බවට පත් කොට සුළ‍ඟෙහි පා කරවයි. අතට හසු නොවන සිතට නිවැරදිව නිර්වචනය කරගත නොහැකි නිශ්චිත ගුණාංයන් මේ යයි පැවසීමට අසීරු ප්‍රේමය ඒ සියලු අපැහැදිළි කම් නිසාම නිපන් අද්භූත සෞන්දර්යයකින් දිදුළයි. ව්‍යවහාරික මනෝවිද්‍යාඥ  Scott Peck කියන්නේ ආදරය යනු අනෙකාගේ අධ්‍යාත්මික වර්ධනය වෙනුවෙන් කැප වීමට ඇති වුවමනාවන්හි එකතුවක් බවයි‍.  ඒ එකතුව තුළ ආදරය යනු  හුදු  හැඟීමක් නොවේ. එය සජීවී වූත් අඛණ්ඩ වූත් ක්‍රියාවලියකි. ඒ ක්‍රියාවලිය දෙදෛනෙකු  බැගින් එක්ව අත්විඳින්නාවූ ‍නිමේෂයන්ගෙන් සැදුම් ලත් අසීමිත කාලයක් මේ විශ්වය දරාගෙන හිඳී. එය චිත්‍රණය කරමින් ප්‍රේමකීර්ති යළිත් වරක්   සොබා දහමේ නොකිළිටි වර්ණයන්ගෙන් ප්‍රේමය පෑ ගන්වයි.


“ඔබෙ දෙතොල් පෙති ලිහී පිපුණු හස‍රැල් විලේ
හද දියඹ ගලායයි ‍රැළි ලමින් සැලි සැලී
මෙවන් සුව පෙර නොවිඳි තුන් සිතම සලිත වේ
සසර සැරි සරන තෙක් ඔබ මගේ - ඔබ මගේ......”


සංසාරය සහ සසර පුරා එකම සහකරුවෙකු හෝ සහකාරියක පතාගෙන  යළි යළිත් ඉපදීම යනු ප්‍රධාන වශයෙන් බුදු දහමේ එන සංකල්පයන් ය. එය වඩා විචිත්‍රවත්ව කියැවෙන්නේ ‍ජාතක කතා හරහා සහ වෙනත් සාහිත්‍ය මූලාශ්‍ර හරහා ලේන කුලයේ පටන් නොසිඳී පැවතුණු  සිද්ධාර්ථ සහ යසෝදරා ගේ බන්ධනය ඇසුරිනි.  මීට පෙර ක්‍රි. පූ. නමවන සියවසින් පසු හින්දු ආගමේ ද මෙම අදහස වර්ධනය වන්නට පටන් ගැණුනු අතර තමන් කල කුසල්වලට ප්‍රතිවිපාක ලෙස යළි උපතක් ලැබෙන බැව් එයින් විශ්වාස කෙරුණි. පයිතගරස් , සොක්‍රටීස් මෙන්ම ප්ලේටෝ වැනි දාර්ශනිකයින් පවා මෙම අදහස දැරූහ. ඊට අමතරව පුනරුත්පත්තිය යනු ප්‍රධාන ලබ්ධීන්ගෙන් අවශේෂ වන පරම විඥානාර්ථවාදය ඇතුළු ආගමික කණ්ඩායම් ද සයිබීරියාව, බටහිර අප්‍රිකාව, උතුරු අමෙරිකාව සහ ඔස්ට්‍රේලියාව වැනි ලොව පුරා පැතිර ඇති රටවල වසන  ගෝත්‍රික කණ්ඩායම් ද අදහන සංකල්පයකි.  


අප මේ මොහොතේ ජීවත්වන කාලාන්තරය තුළ  ප්‍රේමය වඩා සංතෘෂ්ටිජනක වන්නේ සිය පෙම්වතා හෝ පෙම්වතිය සමඟ එකට ගත කිරීම යි. එය නිමා වී තනි වූ විට ඇතිවන රික්තකය පිරෙන්නේ වඩ වඩා ඇලෙන ගැලෙන සෙනෙහසක් හා දැකුමක මාත්‍රයක් පිළිබඳ ඇතිවන වුවමනාවෙනි. සොඳුරු ස්මරණයන්ගෙනි. 


“හිරු නිවී මුහුදු තෙර රාත්‍රිය එළඹිලා
තරු කඩා වැටෙනවිට අහස් ගඟ කළඹලා
මට බලා ඉන්න බෑ ඔබෙ නුවන් පෙනෙනවා
සසර සැරි සරන තෙක් ඔබ මගේ - ඔබ මගේ..”


ඉනික්බිතිව එළඹෙන රාත්‍රිය යනු මේ භවයක් කෙළවරව එළඹෙන තවත් එක් භවයක් බඳුය. ඒ තුළ ඇගේ දෙතොල් පෙති ලිහෙන්නේ නැත. ඇය නික්ම ගොස් ඇති බැවිනි. ඔහු සිටින්නේ තනිව ම ය. එහෙත් ආකාශ ගංගාව කලතමින් තරු පොලවට වැටෙනු පාළු මුහුදු වෙරළේ සිට ඔහු බලා හිඳියි. තරු ඔහුට සිහිපත් කරනුයේ අනෙකක් නොව පෙර දිනෙක බොහෝ වෙලාවක් නෙතින් නෙත කියවූ ඇති  ඇගේ දෑස යි. 


“මට බලා ඉන්න බෑ ඔබෙ නුවන් පෙනෙනවා...” යයි වික්ටර් ගයද්දී පෙම්වතා තුළ පෙම්වතිය කෙරේ මුල් බැසගත් ගැඹුරු සෙනෙහස සහ එය ‍ඓන්ද්‍රීයව ස්පර්ශ කරන්න්ට නොලැබීමෙන් ඇතිවන නොඉවසිල්ල අසන අප තුළ ද ජනිත කරයි.  ප්‍රේමකීර්ති ගීත මාධ‍්‍යයෙන් අප තුළ දනවන ඒ සොඳුරු වේදනාව ම  බ්‍රිතාන්‍ය ජාතික සිනමාකරුවෙකු වන ජොනතන් ග්ලේzසර් වෙනත් අයුරකින් ඇමරිකානු සිනමාවට නැගූ අවස්ථාව විමසා බැලුවහොත් පැහැදිළි වන්නේ සදාතනික ආලය පිළිබඳව මිනිසා තුළ ඇති නොතිත් ඇල්ම යි.  


සීන් නම් තරුණ විය අග්ගිස්සේ සිටින පුද්ගලයෙකු පුද්ගලයෙකු සෙන්ට්‍රල් පාක් හි දෛනික ව්‍යායාම සඳහා දුවන අතරතුර නොපෙනෙන ප්‍රේක්ෂකාගාරයට යමක් විස්තර කරයි. තමන් කිසිසේත් පුනරුත්පත්තිය විශ්වාස නො කරන බවත් එය කමකට නැති වල් පල් ගොඩක් බවත් පවසමින් දිවයන ඔහු උද්‍යානය තුළ දී ම හෘදයාබාධයකට ගොඳුරු වී ඇද වැටී මිය යයි. 


Inline images 2

ඊළඟට අපට  හමුවන්නේ දස වසරක් ඔහුගේ වියෝව වෙනුවෙන් ශෝක වූ ඔහුගේ බිරිය, ඇනා(Nicole Kidman) ය. දසවන වසර අවසානයේ දී නැවත විවාහ වීමට කැමැත්ත දී ඇති ඇය සිය විවාහාපේක්ෂිත පෙම්වතා, ජෝසප් රථයේ නවත්වා  සීන් ගේ සොහොන  අසල ට ගොස් කඳුළු පිසිමින් පැමිණෙයි. ඉන්පසු  ඇනා සහ  ජෝසප්  විවාහ ගිවිස ගන්නා උත්සව අවස්ථාව එළඹෙයි.  ඊට ඇනා  ද ඇගේ පවුලේ අය ද සහභාගී වන අතර සීන් ගේ සොයුරා ද සිය බිරිය සමඟ එහි පැමිණෙයි. හදිසියේ ම ක්ලාරා එනම් සීන් ගේ සොයුරාගේ බිරිඳ මඳකට අවසර ඉල්ලමින් පිටතට ගොස් කිසියම් අඳුරු තැනක තමන් ඇනා වෙනුවෙන් ගෙනා ත්‍යාගය වළලා ඒ වෙනුවට වෙනත් ත්‍යාගයක් සූදානම් කර ගනියි. මේ සියල්ල කුඩා පිරිමි ළමයෙකු රහසින් බලා හිඳියි. ඇය පිටව ගිය පසු එතැනට යන ඔහු ඒ පොදිය සාරා ඉවතට රැ‍ඟෙන යයි.

සියල්ල වෙනස් වන්නේ දස වියැති මේ කොළුවා (Cameron Bright) ඇනාගේ මව විසින් පවත්වන  සාදයකට පැමිණ ඇනා කැඳවාගෙන ගොස් තමන් ඇගේ සැමියා (සීන්) බවත් ඇය කිසිසේත් ජෝසප් හා විවාහ නො විය යුතු බවත් පැවසූ විට ය. 

ඇනා මුලින් එය  ගණන් නො ගන්නා නමුදු පසුදා උදෑසන ඔහුගෙන් ලැබෙන ලිපිය නිසා මඳක් විපිළිසර වෙයි. මේ කොළුවා ඇත්තටම ඔහු සීන් ගේ පුනරුත්පත්තිය යයි විශ්වාස කරමින් සිටින බව ඇයට තේරුම් යයි. සිය අනාගත සැමියා සමඟ මේ පිළිබඳව සාකච්ඡා කරන ඇනා කිසියම් තීන්දුවකට එළඹෙයි. ඒ,  ඔවුන් මේ දරුවා සොයා ගොස් ඔහුට ඇනා පසුපස ඒම අත්හරින ලෙස කරුණු පහදා  දිය යුතු බව ට ය. ඒ සොයා ගැනීමේ දී කොළුවාගේ නම ‘සීන්’ බව ඔවුන් දැන ගනියි. ජෝසප් සහ ඇනාගේ පියා එක්ව සිය පියා සමඟ සිටින කොළුවාට  ඇනා ගැන සෙවීම අත් හරින ලෙස බල කෙරෙයි.  එය ප්‍රතික්ෂේප කරන ඔහු ඇනා ද තමන් විශ්වාස කිරීම ප්‍රතික්ෂේප කරන බැව් වටහා ගන්නා සැණින් පොළොවට කඩා වැටෙයි.  එතැන් පටන් කුඩා සීන් යනු තම මිය ගිය සැමියාගේ පුනරුත්පත්තිය බව ඇනා විශ්වාස කරන්නට පටන් ගනියි. 


පසුදා ඇනාගේ දුරකථනයට කුඩා සීන් විසින් පටිගත කරන පණිවුඩයට සවන් දෙන්නේ ඇනාගේ මව යි. ඔහුට ඇනාව උද්‍යානයේ දී හමුවීමට අවශ්‍ය බව හා තැන ඇය දන්නා වග කී බව ඇය ඇනාට කියයි. ඇනා කෙළින් ම යන්නේ උද්‍යානයේ දී  සිය සැමියා මිය ගොස් සිටි තැනට ය. හරියට ම එතැන කුඩා සීන් ඇය එනතුරු බලා හිඳියි. ඉනු පසු ඇය නඟන ප්‍රශ්නවලට ඇය පිළිතුරු දෙයි. 


ඉන් පසු මේ ගැටළුවට මැදිහත්වන ඇනාගේ ඥාති සහෝදරයෙකු සහ වෛද්‍යවරයෙකු  වන බොබ් පවසන්නේ ඔහුට සීන්ගේ පිළිතුරු පටිගත කිරීමට අවශ්‍ය බව යි.  අසන ප්‍රශ්නවලට ඉතාම පැහැදිළිව සහ අවංකව පිළිතුරු දෙන කුඩා සීන් ඇනාගේ සහ ඔහු ඇගේ සැමියාව සිටි පෙරභවයේ ලිංගික අත්දැකීම් පවා නො පැකිළ විස්තර කරයි. පසුව ඔහුව ඇනාගේ නිවසට රැ‍ඟෙන යනු ලබන අතර  ඔහු ඒ නිවසේ බොහෝ තැන් හඳුනා ගෙන විස්තර කරයි. ඇනා හැර පවුලේ සියල්ලන් මේ සිදුවීම් දෙස බලන්නේ සාධාරණ සැකයකිනි. නමුත් එතැන් පටන් ඔවුන් මේ ගැන වධ වීමට  පටන් ගනියි. 


කුඩා සීන් සිටින්නේ තම විශ්වාසය පිළිබඳ ද්‍රෘඩතර විශ්වාසයකිනි. 


ඇනා:  “ඔබ මොනවද කරන්නෙ?”
කුඩා සීන් :  “මම මගේ බිරිඳ දිහා බලන් ඉන්නවා.” 


පසු වතාවක ජෝසප් හමු වීම පසෙක තබා කුඩා සීන් හමුවීමට යන ඇනා එයින් ජෝසප් ගේ සැකය අවුළුවාලයි. ඔහු සිත රිදවා ගන්නේ සීන් නිසා නොව ඇනාගේ අමුතු හැසිරීම නිසා ය.  එහි ප්‍රතිඵලයක් ලෙස ඇනාගේ නිවසේ උත්සවයක දී කුඩා සීන්ට හිරිහැර කිරීමට  ජෝසප් පෙළඹෙයි. සීන් ඇනාගේ නිවසින් පිටතට දිව යන විට ඔහු පසු පස යන ඇනා ඔහුගේ දෙතොල සිප ගනියි. 


කුඩා සීන් ව විශ්වාස කරන ඇනා ඔහු ව ඇගේ සැමියා ව සිටි සීන්ගේ සොයුරාට  සහ   බිරිඳ වන   ක්ලාරා ට හඳුන්වා දීමට තීරණය කරයි. එහිදී කාටත් රහසින් සීන් හා කතා කිරීමට අවස්ථාවක් ලබා ගන්නා ක්ලාරා ඔහුව තනිව හමුවීට අවශ්‍ය බව පවසයි. ඉන් පසු මිය ගිය සීන්ගේ  සොයුරා දකින කුඩා සීන් දිව ගොස් ඔහු සෙනෙහසින් වැළඳ ගනියි. 


පසුව ක්ලාරා හමුවීමට යන කුඩා සීන් ට ක්ලාරා සිය රහස හෙළි කරයි. තමන් ඔහු සීන් යයි  විශ්වාස නො කරන බවත් ඔහු සැබවින්ම සීන් නම් මුලින් පැමිණ හමුවන්නේ තමාව මිස ඇනාව නොවන බවත් ඇය කියයි. මන්ද සීන් මිය යන විටත් ඇය ඔහුගේ රහසිගත පෙම්වතිය යි. එදා රාත්‍රියේ ඇය වළ දැමූයේ ඇනා සීන්ට ලියූ ආදර හසුන් බවත් ඔහු ඒ සියල්ල විවෘත නො කරම තමන්ට ‍ගෙනැවිත් දුන්නේ තමන් කෙරෙහි ඇති ආලයේ තරම පෙන්වීමට බවත් ඇය කියයි. ඇනා කෙරෙහි වූ කෝපය නිසාම ඇගේ දෙවන විවාහයට ත්‍යාගයක් ලෙස ඒ හසුන් මිටිය දීමට තීරණය කළත් පසුව අදහස වෙනස් වූ නිසා ඇය ඒවා වළ දමා ඇත. කුඩා සීන් තමන් හඳුනා නොගත් නිසා ඇය කිසිසේත් ඔහු පෙර සිටි සීන් යයි විශ්වාස නො කරයි. විපිළිසර වන කුඩා සීන් එකම එක ඉල්ලීමක් පමණක් කර පිටව යයි. 


“ඇනාට කියන්න එපා.”


කුඩා සීන් ව සොයා ගෙන යන ඇනා පවසන්නේ ඔහු තම සැමියා බව තමන් විශ්වාස කරන බව ය. තමුන් දෙදෙනා සැඟවී පළා යා යුතු බවත් නිසි වයස එළඹුණ කල්හි තමන් ඔහු හා විවාහ වන බවත් ඇය පවසයි. නමුත් ඇය පුදුමයට පත් කරමින් ඔහු පවසන්නේ තමන් ඇයගේ සැමියා නොවන බවත් සිදු වූ සියල්ල වැරදීමක් බවත් ය. මෙහිදි අපට සිතා ගැනීමට යමක් නිර්මාණකරුවා ඉතිරි කරයි. එක් භවයකින් තව භවයකට එද්දී ඔහු ගේ අභ්‍යන්තරයේ ගැඹුරුම තැනක හිඳින්නට ඇති සිය බිරිඳ කෙරෙහි වන ආලය මිස ක්ලාරාගේ අසම්මත ප්‍රේමය පිළිබඳ ඇල්ම ඔහුගෙන් ගිලිහෙන්නට ඇත. සීන් එක්වරම ඇය ප්‍රතික්ෂේප නොකළා නම් හෝ තව දුරටත් ඔහු පෙර සිටි සීන් ම යයි ඔප්පු වූවා නම් ක්ලාරා සිදු කරන්නට ඉඩ තිබෙන විනාශය ඔහුට වැටහී යන්නට ඇත. හොඳම දෙය තමන් සීන් නොවන බව ක්ලාරාට ඒත්තු යන සේ හිඳීම යි. එක් භවයක ආදරය පිළිබඳ මතකය සහ ඇනාගෙන් සීන් වෙත පිදෙන අසීමිත මෙන්ම නොමැරෙන සෙනෙහස නොකැලැල්ව ඉතිරි කිරීම මේ භවයේදී ඇය ලබා ගන්නට ගොස් සියල්ල අහිමි කර ගැනීමට වඩා වටියි. ඇනා තම ප්‍රේමය රැවටිල්ලක් ලෙස වර නගා ගැනීමට වඩා තමන්ගේ පරිකල්පනීය ආලය තුළ සදාකාලිකව  තෘප්තිමත්ව හිඳිනු ඇතිය යන්න ඔහුගේ අභිප්‍රාය වන්නට ඇත.


සීන්ගේ අනපේක්ෂිත පිළිතුර සහ ප්‍රතික්ෂේප කිරීම නිසා සම්පූර්ණයෙන් බිඳ වැටෙන ඇනා පසුව ඒ නොවන්නේ යයි  හිත හදාගෙන ජෝසප් ගේ සමාව ලැබ ඔහු හා විවාහ වෙයි. විවාහ උත්සවයේ ප්‍රීතිය අතරතුර ඒ ගැන ඇති අවධානය ගිළිහී ගොස් මුහුද දෙස යොමා ගත් හිස් බැල්මෙන් යුතුව සම්පූර්ණයෙන් අවධානය ගිලිහී ගිය ඇනා අපට හමුවෙයි. 


සියල්ල අවසන් වන්නේ කුඩා සීන් සිය අධ්‍යයන කටයුතු නැවත අරඹා ඒ අතරතුර සමාව ඉල්ලා ඇනාට ලියන ලිපියකිනි. තමන් ඇගේ සැමියා බව සිතුවේ ‘මොන විකාරයකින්’ දැයි නො දන්නා බව ලියන ඔහු සිය ලිපිය මෙසේ අවසන් කරයි. 

“මම හිතන්නෙ අපි වෙන භවයකදි ආයේ මුණගැහෙයි.”


 
*   *   *
ජොනතන් ග්ලේzසර් (Jonathan Glazer) ට  ඕනෑ වූයේ  ‘සදාතනික ප්‍රේමය’ සහ ‘හදවතේ අභිරහස’ විදාරණය කරන චිත්‍රපටයක් සෑදීමට ය. එහි ප්‍රතිඵලය වසර 2004 දී  ඉහත කතා පුවත රැ‍ඟෙන එළිදුටුවේ ‘Birth’ යන නමිනි. 21 වරක් නැවත නැවත අමුතුවෙන් ලියනු ලැබූ පිටපතකින් නිර්මාණය කෙරුණු මෙහි ප්‍රධාන චරිතය රඟන නිකොල් කිඩ්මන්ගේ සම්පූර්ණ පෙනුම වෙනස් කරන ඔහු ඇයට කෙටි කෙස් වැටියකින් සහ ‘තමන් සතු සියලු ආශාවන් සහ ආලෝකයන්  සිය කැමැත්තෙන් අත්හැර දමනු ලැබූ’ පෙනුමක් ලබා දෙයි. 


මෙවැනි පුනර් ජන්ම සංකල්ප නො අදහන බටහිර විචාරකයින් බහුතරයක්ගේ අප්‍රසාදය හිමි වුවද රූප රාමුවෙන් රාමුව දැඩි ශක්තියකින් බැඳ තබන ග්ලේzසර් ආඛ්‍යානයේ අඛණ්ඩ ගලා යාම චිත්‍රපටයේ  මුල සිටම රැකගනියි. පරිසර සාධක, අඳුර සහ ආලෝකය මනාව යොදා ගනිමින් සිද්ධීන් ගලපයි. ඇනා සහ කුඩා සීන් උද්‍යානයේ දී හමුවන මොහොත ඊට කදිම නිදසුනකි. 

සියළු චරිත මනාව ගොඩ නඟමින් ඔවුන්ගේ චිත්‍යාභ්‍යන්තර භාවයන් අපූර්ව ලෙස ඉදිරිපත් කරයි. මුල දී දෙලොවක් අතර විපිළිසර වන ඇනා පසුව තම සිතැඟි හෙළි කරයි. 


Anna:  “I really hoped that he was Sean. I ‘wanted’ him to ‘be’ Sean. ......”


ඇනා: “සීන් වෙන්න පුළුවන් කෙනෙක් මට මුණගැහිල තියෙනවා. මට ඇත්තටම අවශ්‍ය වුනේ ඔහු සීන් වෙන්නයි. මට ඕනෙ වුණා ඔහුව සීන් විදිහට දකින්න. මෙතන වැදගත්ම දේ තමයි මම ආයෙත් සීන් එක්ක ආදරෙන් බැ‍ඳෙන එක. ඒකයි සිද්ධ වෙන්නෙ.”


Inline images 3


කිසිදා නිමා නොවන පරම වූ ප්‍රේමයක් පිළිබඳ මිනිසා සතු ඇල්ම මරණයට පවා විනාශ කළ නොහැකි බව ග්ලේසර් එසේ සිතුවම් කරද්දී  සිහියට නැ‍ඟෙන්නේ සංසාරය පුරා එක්ව ආ මඟ බිඳී ගිය ක්ෂණයක දී එකිනෙකා ඇසුරෙහි ගෙවා  දැමූ,  එකිනෙකා තුළ ගොඩනැගුණු යුග ගණන් පිළිබඳ ප්‍රේමකීර්ති ලියන අයුරු ය.  

“යුග ගණන් පැමිණි මඟ පැටලිලා වැරදිලා
ඔබ මගෙන් වෙන්ව ගිය ලකුණු ඇති මාවතේ
මට බලා ඉන්න බෑ පෙර ඇසුර හැ‍ඟෙනවා
සසර සැරි සරන තෙක් ඔබ මගේ - ඔබ මගේ....”

 

එලි‍නෝර්: “ඔබ ඔය දන්න දේවල් කොහොමද දන්නෙ?”
කුඩා සීන් : “මම සීන්”


“මට බලා ඉන්න බෑ පෙර ඇසුර හැ‍ඟෙනවා” යනුවෙන් කියවෙන්නේත් එය ම නොවේද? 


බොහෝ කල් ගත වී එකම ඉර හඳ යළි හමුවෙද්දී කයින් ද සිතින් ද ඒකාත්මික වූ දෙදෙනා බොහෝ දුරස්ව ඇත. කුඩා සීන්ට සිය වයස බාධාවකි. ඔහුගේ සංජානනයන් අනෙකුන්ට පිළිගැනීමට සැලැස්වීම අසීරු කාර්යයකි.  අනෙක් අතට ඇනාට යටි සිතින්  අවැසි ඔහු සීන් ම වීම ය. ඇනාට කරදර නො කරන ලෙස මුල්වර ඉල්ලන අවස්ථාවේදී එය දරා ගත නොහැකිව ඔහු බිඳ වැටීම ඇය කම්පනය කරවයි. ඇය නැවත නිවෙසට ආ පසු ඒ ගැන කියන්නේ වේදනාවෙන් මිරිකෙමින් වෙව්ලන කටහඬිනි. 


Anna: Then he…… 


           he……. 

           Collapsed!

“අහස්තල පොළෝතල ඔබට මට පොදු වෙලා
හදවතින් එක් උනත් ගතින් දෙදෙනෙකු වෙලා
මට බලා ඉන්න බෑ සියොළඟ ම තැවෙනවා
සසර සැරි සරන තෙක් ඔබ මගේ ඔබ මගේ....”


වික්ටර් ඒ ශෝකයෙන් වෙව්ලන ස්වරයෙන්ම ප්‍රේමය අහිමි වීමේ ඛේදනීය බව  “මට බලා ඉන්න බෑ සියොළඟ ම තැවෙනවා” යනුවෙන්  ගයයි. 


ආදරය සහ සබඳකම් ගැන කොතෙකුත් නිර්වචන තිබුණද කවර දෘෂ්ටිවාදයකින් ඒවා විග්‍රහ කළ ද සදාතනිකව පවතින ආදරයක් ගැන නිධන්ගත වු වුවමනාවක් සියල්ලන් තුළ ඇත. පුනරුත්පත්තිය නො අදහන, මෙබඳු  පාරභෞතික  විග්‍රහයන්ගෙන් සහ ආගමික මතවාදවලින් බැහැර අය පවා චිත්‍රපටයට වසඟ වන්නේ ද ශ්‍රාවකයින් ප්‍රේමකීර්තිගේ “සසර සැරි සරන තෙක් ඔබ මගේ” මෙතරම් හද ගැඹරෙහි බහා තබා ගෙන හිඳින්නේත් ඒ නිසාමය. 


“ආදරය සිල්ල අභිබවන්නේ ය”යි  රෝම මහා කිවි වර්ජිල් කීවේ එනිසා  වන්නට ඇත. 


ඔබෙ දෙතොල් පෙති ලිහී පිපුණු හස‍රැල් විලේ
හද දියඹ ගලායයි ‍රැළි ලමින් සැලි සැලී
මෙවන් සුව පෙර නොවිඳි තුන් සිතම සලිත වේ
සසර සැරි සරන තෙක් ඔබ මගේ ඔබ මගේ......

හිරු නිවී මුහුදු තෙර රාත්‍රිය එළඹිලා
තරු කඩා වැටෙනවිට අහස් ගඟ කළඹලා
මට බලා ඉන්න බෑ ඔබෙ නුවන් පෙනෙනවා
සසර සැරි සරන තෙක් ඔබ මගේ ඔබ මගේ..

නා ගසක් දළු දමා වසන්තය එළඹිලා
මඳ පවන් ‍රැල් වැදී සැලෙනවිට කැළඹිලා
මට බලා ඉන්න බෑ දෙතොල් ඔබෙ පෙනෙනවා
සසර සැරි සරන තෙක් ඔබ මගේ ඔබ මගේ..

යුග ගණන් පැමිණි මඟ පැටලිලා වැරදිලා

ඔබ මගෙන් වෙන්ව ගිය ලකුණු ඇති මාවතේ
මට බලා ඉන්න බෑ පෙර ඇසුර හැ‍ඟෙනවා
සසර සැරි සරන තෙක් ඔබ මගේ ඔබ මගේ....
 

අහස්තල පොළෝතල ඔබට මට පොදු වෙලා
හදවතින් එක් උනත් ගතින් දෙදෙනෙකු වෙලා
මට බලා ඉන්න බෑ සියොළඟ ම තැවෙනවා
සසර සැරි සරන තෙක් ඔබ මගේ ඔබ මගේ....

ගී පද: ප්‍රේමකීර්ති ද අල්විස්
ගායනය:වික්ටර් රත්නායක


ගීතය අහන්න.


ආශ්‍රිත මූලාශ්‍ර:


9 comments:

  1. අපූරු සිංහල ගීතයක් සමඟ මේ චිත්‍රපටය මුහුකරපු අයුරු හිතා ගන්න බැරි තරම් අගෙයි.

    මම මේ චිත්‍රපටය නරඹලා තියෙනවා.ඒ මීට බොහොම කලකට කලින් ස්වාධින රූපවාහිනියෙන්.ඒත් එදා මම දැකපු කතාව (මගේ දැක්ම) මීට වඩා වෙනස්.

    මට ඒ චිත්‍රපටය පෙනුනේ , පුනර්භවය /නැවත ඉපදීම අදහන කොට්ටාශයකයට එය එසේ නොවන බව පෙන්වීමට ඉඩ සැලැසූ එකක් බවයි.

    මොක ද කියනව නම් කුඩා සීන් මේ සියළු විස්තර සොයා ගන්නේ අර වල දැමූ ලියුම් මිටි ටික කියවලා. ඊට පස්සෙ තමා ඔහු ඇය හඹායන්නේ.

    ඒ මම දැකපු හැටි.

    මේ ලිපිය කියවනකම් ම මම හිතුවෙ එහෙම.

    අගනා ලියැවිල්ලක්.

    ReplyDelete
    Replies
    1. සොඳුරු සිත ට ස්තූතියි. මම යෝජනාවක් කරන්නම්..ඔබ චිත්‍රපටය නැවත බලන්න. එක රූප රාමුවක්වත්, එක දෙබසක්වත් මඟ නෑරම. මේ චිත්‍රපටය අපූරු එකක් වෙන්නෙ ඒ හේතුව නිසා. එක තැනක් හො මඟ හැරුණොත් අපට සම්පූර්ණ අදහස මඟ හැරෙනවා. එය බලලා ඊට පස්සේ ජොනතන් ග්ලේසර්ගේ සම්මුඛ සාකච්ඡාව කියවන්න. ලින්ක් එක මෙහි දමා ඇති. කෙසේ වෙතත් ඔබ චිත්‍රපටය නරඹා තිබීම සතුටක්.
      නැවත එන්න.

      Delete
  2. ලස්සන සරු ලියවිල්ලක්. බ්ලොග් අවකාශෙට අවශ්‍ය මේ වගෙ දේවල්ය කියලා මම හැමදාම හිතනවා.
    දැන් ඉතින් මේ ෆිල්ම් එකත් ලිස්ට් එකට දාගන්නව ,,, :) ස්තූතියි....

    වසිලිස්සාගේ සොඳුරු රසඥතාවයට ජය පතමි. තව තවත් මේ වගෙ හරවත් දේ ලියන්න .... අපි එනවා කියවන්නට

    ReplyDelete
    Replies
    1. @ ජීවිතේ මල්, ස්තූතියි. චිත්‍රපටිය බලන්න. නැවත එන්න.

      Delete
    2. ගීතය විතරයි අහල තිබුනේ. චිත්‍රපටය ගැන හාංකවිසියක් නෑ. ගීතය උනත් මේ තරම්ම අරුත්බර බව දැනුනෙ දැනුයි. මේ දෙකම එකට පාහල අපට බෙදන්නට ඔබතුමාට පහලවුන දැනුම් සම්භාරය වෙනුවෙන් මගේ ආචාරය....
      මෙවන් වටිනා දේ තව තවත් එලිපෙහෙලි කරන්නට ශක්තිය පතමි.....

      Delete
  3. ලස්සන ලියවිල්ලක්. කොච්චර ලස්සනද කියනවා නම් කමෙන්ට් එකක් කරල අවලස්සන කරන්න නොහිතෙන තරම් රසයි.
    මොකවත් නොකියාම යන්න හිත් දෙන්නේ නැති නිසා යමක් ලියන්නම්.

    ඉස්සර ඔටෝග්‍රාෆ් වල ලියනව " ආදරය දෙවෙනි වන්නේ නිර්වාණයට පමණයි" කියල. නිර්වාණය කියන්නේ තමන්ගේ සිත දියුණු කර ගැනීමෙන් පමණක්
    ලද හැකි දෙයක්. ආදරය කියන්නේ වෙනත් කෙනෙකුගේ හිතක් තේරුම් ගැනීමක්.
    එතකොට එය නිර්වාණයටත් වඩා ඉහළයි නේද ?

    මේ ගීය ඔබා අසා ඇද්ද ? " චේතනා පරිශුද්ධ වේ නම් පෙම් සටන් පරදින්නෙ
    නෑ" එහි තැනක තියෙනවා ප්‍රේමයට දිවි පිදූවන් මිස ප්‍රේමයෙන් ජය ලැබූ අය නැත කියල.

    ප්‍රේමය අහිමි වීම නිසා දිවි තොර කර ගත් අය කී දෙනෙක් ඇද්ද ? ජීවිතෙටම අවිවාහකව ඉන්න අය කී දෙනෙක් ඇද්ද ? ආදරය කියන්නේ භවයෙන් භවේ
    පතා ගෙන එන දෙයක්ද ?

    මට නම් හිතෙන්නේ මෙහෙමයි. " ආදරය කියන්නේ යම් වයස් සීමාවකදී
    කෙනෙකුගේ සිරුරේ ඇතිවන හෝමෝන වෙනස් වීම නිසා ඇතිවන , ජීව විද්‍යාත්මක අවශ්‍යතාවයක් හා ආත්මාර්තකාමී සිතිවිල්ලක්" කියලයි.

    වික්ටර් රත්නායක ගයන " සඟවා ගනු මැන ඔබැ රුව " ගීය ඊට නිදසුනක්.

    ReplyDelete
  4. @ Nimal (Desertfrog) - ඔබට ස්තූතියි.

    @nihal gurusinghe- ස්තූතියි අදහස් දැක්වීම ගැන වගේම අපූරු ගීතමය උදාහරණවලටත්.

    ReplyDelete
  5. ආදරය මහ පුදුම දෙයක්. ඒක ඇට මිදුළු පසාරුකරගෙන යන පුදුමා කාර සිතිවිල්ලක්. අපි ආදරෙන් බැඳෙන්නෙ සසර පුරුදු මතමයි. නැත්නම් ඔහේ ඔනෙම කෙනෙක් එක්ක අපිට ජීවත් වෙන්නෙ බැරියැ. සංසාර ගමන අපි එහෙම යන්නෙ නෑනෙ. කෙනෙක්ගෙ හිමිකරුවා ලැබෙන්නෙ ඒ පුරුදු මතම තමයි කියල මට නම් අනන්ත හිතෙනවා. නැත්නම් මට මගෙ මහත්තයාව දුර ඈත රටකදී හමුවේවිද? ලංකාවෙදී කවම දාක වත් නොදැක. ඒ ආදරේ අසිරිය වින්ද කෙනෙක් නිසා ආදරේ සසර පුරුද්දක්ම තමයි කියල හිතෙනෙත්. චිත්‍රපට බලන්න බැරි උනා. කොහොම හරි බලන්නම්. ස්තූතියි පොස්ට් එකට. සේරටම වඩා මම ගොඩාක් ආදරේ කරන ගීතයක් මේ සටහන පැහැදිලි කිරීමට යොදාගත්තාට ගොඩාක් ස්තූතියි!

    ReplyDelete
  6. Thank you Chandi and wish you good luck for the love you share with your husband..

    ReplyDelete