සොඳුරිය,
ඔබට ඇත්තේ
සුරංගනාවියකට කන් දෙන්න
සමණලුන්ගෙන් පියාපත්
නොඉල්ලන්න
මම කැමති ඔබට දම් නීල
පියාපත් දෙන්න
ඒ මත යන්තමින්
එමරල්ඩ් කොළ පැහැය තවරන්න
ඉතිං ඔබ කැමති නම්
සමණලුන් එක්ක
ටික දුරක් ඉගිළෙන්න
මන්ද්‍රමය මිමිණුමක
උන්මාද ස්වර තන්තු මත ඉපිළෙන්න
ඇස් අඳුන් මැකෙන තුරු
හීනයක කිමිදෙන්න
මම කැමති
ඒ හීනයේ කෙළවරක
තව හීනයක් අමුණන්න
ඔබ අවදි නොමවෙන්න
ඒක තානමය රඟහළක
වේදිකාවෙන් මඳක් බැස එන්න
රන් පාට සැඳෑවක
ඉතා කළබල වීදියක
රොමෑන්තික ඔපෙරාවක්
කැරිබියන් නැටුමකින් කළඹන්න
ඇත්තට ම ඔබට ඇත්තේ
සුරංගනාවියකට කන් දෙන්න
හදවතක ඇත්තේ ගැස්මක් නොව
මන්ද්‍රමය නිද්‍රාවක සිට නැගෙන
උච්ච සංධ්වනියක් බව පිළිගන්න
09-01-2016
No comments:
Post a Comment